Impormasyon nga may pulitiko nga naga-hire sang serbisyo sang NPA, i-validate pa; Private armed group sa probinsiya, naglie-low – IPPO Director

IPPO Headquarters, Sta. Barbara, Iloilo – May impormasyon nga nabaton ang Iloilo Police Provincial Office (IPPO) nga may mga pulitiko nga naga-hire sang serbisyo sang New People’s Army (NPA) para sa May 13, 2019 midterm elections.

Suno kay IPPO Director Senior Supt. Marlon Tayaba, i-validate pa sang iya operatives ang amu nga impormasyon nga ginpahayag halin sa mga high risk municipalities ukon may pamahog sang rebelde nga grupo.

Samtang, naglie-low na ang mga private armed groups nga ginpahayag gina-mentinar sang mga pulitiko sa probinsiya suno kay Tayaba.

Gin-aku ni Tayaba nga may yara sadto sang mga private armed groups pero sa subong, nagtahaw ang ila presensiya bangud sa ginpasangkad nga police operations.

Nagpaandam si Tayaba nga may salabton kag mahimo makasuhan ang mga pulitiko nga naga-solicit sang suporta sang rebelde nga grupo.

Una na nga ginpahayag ni Police Regional Office 6 Director Chief Supt. John Bulalacao nga may mga pulitiko sa rehiyon nga ginpahayag nagakuha sang serbisyo sang NPA kag private armed groups. (JoMaque)