Kita sang mga ‘sikad’ drivers sa Molo, apektado sang pagbiyahe sang e-bikes

Iloilo City–Halos katunga sang ila kita ang nadula sa mga drivers sang trisikad sa Molo halin sa nagbiyahe na ang mga e-bikes.

Suno kay Mr. Abraham Segura, Presidente sang San Antonio, Molo Sikad Drivers’ Association, naga-pick up sang pasahero sa ila area ang mga e-bike drivers.

Wala sang driver’s permit suno sa iya ang mga e-bike drivers samtang sila nga nagabiyahe sang trisikad kompleto sa permit kag nagabayad man sila sa plaka.

P280 pesos ang bayad nila sa ila plaka kag driver’s permit.

Ginpahayag ni Segura nga sadtu nagalab-ot sa P400 ang kita sang mga sikad drivers kada adlaw sang wala pa ang e-bike pero subong nagalab-ot na lang sa P200 kada adlaw ang ila makita.

Mapasugot suno sa iya ang mga sikad drivers nga i-regulate ang mga e-bikes basta indi lang maglaksam sa ila ruta.

Ginpahayag naman ni Mr. Christopher Pelobello, Presidente sang Katilingban, Molo Trisikad Owners and Drivers’ Association nga apektado man sila sa pagbiyahe sang e-bikes.

Sa subong, ginabanta sa P100 na lang ang ila kita kada adlaw bangud sang pagbiyahe sang mga e-bikes halin sa P300 sadto.

Suno naman kay Mr. Edgardo Oliga, presidente sang asosasyon ang E-bike drivers sa Molo, may masobra 50 sila ka miembro.

Walo ka oras ang charging sang e-bike kag tag-10 pesos man ang ila sukot sa pasahero.

Ginpahayag ni Oliga nga ginahingabot sila sang mga sikad drivers bangud ginpahayag nga gina-agawan nila sang pasahero.

Nanamian suno sa iya nga magsakay sa e-bike ang mga pasahero.

Wala man nagakatabu nga ginalambatan sila sang mga sikad drivers.

Naga-ayo sila sa PSTMO nga indi lang anay sila pagdakpon bangud ang pagbiyahe lang sang e-bike ang ila pangabuhian.

Nagalab-ot sa P300 tubtub P400 kada adlaw ang ila kita sa pagbiyahe sang e-bike

Ginpahayag ni Oliga nga mas bentaha ang parking area sang mga trisikad ikumparar sa e-bike kag indi man sila makaagi sa national roads.

Bentaha lang ang pag-drive sang e-bike suno kay Oliga bangud wala sila nagapamuwersa kag indi hago ang ila lawas.

Indi pa maathag suno sa iya kon kinahanglan nila nga mag-secure sang lisensya.

Bukas man si Oliga nga i-regulate ang e-bikes. (JoMaque)