Lalaki, nasapwan patay kag may mga igo sang pagkatiro sa Guimaras

Guimaras — Patay na sang nasapwan ang 31 anyos nga lalaki sa higad sang karsda sa Barangay Lanipe, Nueva Valencia, Guimaras kahapon sang kaagahon, Mayo 19.         

May mga igo sang pagkatiro sa dughan kag ulo si Romar Ordiales nga tumandok sang Bo. Obrero, Lapuz.

Suno kay Police Captain Henry Gaborno, hepe sang Nueva Valencia Police Station, las-12:40 sang kaagahon may nabatian nga linupok ang mga residente kag may nakit-an nga pick-up pero wala nakuhaan sang plate number ukon color.

Las-5:20 sang kaagahon sang nasapwan ang bangkay.

Pito ka empty shells sang caliber 45, disposable nga lighter kag 250 pesos nga cash ang na-recover sa crime scene.

Base sa imbestigasyon sang mga pulis, nagpadulong sa Guimaras si Ordiales upod ang iya pakaisa nga si Ervin Ordiales agud maglagaw sa Manggahan Festival.

Ginsaysay ni Ervin suno kay Gaborno nga ginsipit sang duha ka lalaki ang iya pakaisa sang Sabado sang gab-i, Mayo 18.

Nagpalagyo kag nagpauli si Ervin kag kahapon sang aga lang nagpanugid nga ginsipit ang iya pakaisa.

Wala pa ma-establish ang motibo sa pagpatay sa biktima kag nagapadayon pa ang imbestigasyon sang mga pulis. (JoMaque)