Pedestrian overpass sa Luna Street, La Paz, ginreklamo nga ginateniran sang nagasimhut sang rugby

By: Aine Grace Bravo | June 29, 2019, 6:30PM

Via Aksyon KhenJo Terco

Iloilo City — Nagpalab-ot sang reklamo sa Aksyon Radyo ang amay sang Grade 7 student sang Iloilo National High School angut sa pagtiner sang ginpahayag nagasimhut sang rugby sa pedestrian overpass sa Luna Street, La Paz.

Suno kay alyas Boy, natabu ang insidente sang damlag sang ginsugat niya ang iya bata, pero nakibot sang nakit-an ang iya bata nga nagadalagan halin overpass kag nagpanugid nga may may lalaki nga nagapahabok sang plastic, may bitbit nga asalan, kag masakit ang panulok sa iya.

Dali-dali nga nagsaka si Boy agud i-check ang lugar kag naabtan niya ang lalaki nga ginatumod sang iya bata nga may uyat pa nga botelya sang rugby. Ginabanta indi maglapaw sa 31 ang edad sang lalaki suno kay Boy.

Nagpangayo sang bulig si Boy sa traffic auxiliary sa lugar kag sa guwardiya sang INHS pero sang ginkadtuan ang overpass, madasig nga nagdalagan ang lalaki padulong sa Magsaysay sa La Paz.

Ginakabalak-an ni Boy ang safety sang kabataan nga nagalabay sa overpass ilabe na kun gab-i ang buhi sang mga estudyante.