Subject sang buy bust operation sa Tanza Esperanza, City Proper nga napatay bangud ginpahayag nagbato, nangin source sang illegal drugs sa BJMP Ungka suno sa RDEU head

By: Aine Grace Bravo | June 29, 2019, 6:30PM

Via Aksyon Jorge Cabrera

Iloilo City — Nangin source sang illegal drugs halin sa presuhan ang napatay nga subject sang buy bust operation sa Tanza Esperanza, City Proper bangud ginpahayag nagbato kaina sang kaagahon.

Suno kay Police Captain Mark Dado sang Regional Drug Enforcement Unit, ginsaylo sadtu halin sa BJMP Ungka pakadto sa BJMP Nanga, Pototan si Japhet Zerrudo alyas Katoy, 30 anyos, bangud na-trace nga naghalin sa iya ang items nga nakuha sa nadakpan sa buy bust operation sa guwa sang presuhan. Napreso si Zerrudo sa kaso nga murder kag bag-o lang nakaguwa suno kay Dado.

Gin-operate sang RDEU si Zerrudo kaina sang kaagahon, pero ginpahayag nga ginpalukpan niya ang mga operatiba gani ginbalusan siya tiro. May anum ka igo sa dughan si Zerrudo nga gindala pa sa ospital apang wala natabangan.

Na-recover sa bulsa sang subject ang pouch, siyam ka sachets sang suspected shabu, aritos kag 7 mil 500 pesos nga buy bust money.

Nakuha naman sang Scene of the Crime Operatives sa crime scene ang apat ka empty shell sang 9mm pistol kag 357 nga ginpahayag ginapanag-iyahan sang subject.

Nagbalibad pa nga magpa-interview ang pamilya ni Zerrudo angut sa natabu.