(UPDATE) Siyam ka establisemento nga naglapas sa EO 46, pangayuan paathag ni Mayor Jerry Treñas

By: Aine Grace Bravo | August 29, 2019

via Aksyon Jeremae Ventar

Iloilo City — Pasabton ni Mayor Jerry Treñas ang siyam ka establisemento nga ginrekomendar sang Business Permits and Licensing Office (BPLO) nga i-revoke ang business permit bangud sa paglapas sa guidelines sang Executive Order 46.

Suno sa alkalde, kabahin ini sang due process sa mga bar owners and operators bisan pa nabutang sa EO ang one-strike policy kon may ginlapas bisan isa sa mga guidelines nga ginplastar para sa mga nagaserbe sang makahulubog nga ilimnon.

Ang siyam ka establisemento amo ang ANGEL A RESTO; JUAN’S MARTHA FOODS CORPORATION sa Smallville Complex; PROJECT EX SPORTS BAR AND RESTO sa City Time Square; SINUKAD GP SEAFOOD RESTAURANT sa Paseo De Arcangeles; BULL & BARREL sa City Time Square; HQ BEERCADE sa City Time Square; GREATFOODS CONCEPTS, INCORPORATED FLOYD’S FAMOUS BBQ sa San Rafael, Mandurriao; PARAISO AFTER 5 DISCO CAFE AND RESTAURANT BAR sa JM Basa Street, City Proper kag CAMP JEFFERSON DISCO PUB sa Yulo Street, City Proper.

Kalabanan sa mga establisemento ang naglapas sa CCTV Ordinance, may naglapas sa No Smoking Ordinance kag Body Frisking guideline sang EO kag may nagserbe sang makahulubog nga ilimnon sa menor-de-edad.