Mga performers kag artists nga magapasakop sa virtual Dinagyang 2021, ipaidalum sa ‘bubble rehearsal’ sang 20 ka adlaw

By: JoMaque | Nobyembre 25, 2020

Iloilo City — Ipaidalum sa 20 adlaw nga ‘bubble rehearsal’ ang mga performers kag artists nga magapasakop sa virtual Dinagyang Festival 2021.

Suno kay Mr. Romel Flogen, presidente sang Ilonggo Artists Festival Association, sa konsepto sang ‘bubble rehearsal’, indi mahimo makaguwa sa venue ang 50 ka performers bangud man sang COVID-19 pandemic.

Sa Nobyembre 26 ang ginaduso nga schedule sa pag-swab sa 40 ka warriors kag 10 ka female dancers.

Amo man nga adlaw magasugod sang ‘bubble rehearsal’ sa inisyal nga impormasyon apang depende pa sa approval sang DepEd-Division of Iloilo City.

Luyag sang IAFA nga gamiton ang Jalandoni Memorial National High School bilang venue.

10 naman ka mga artists nga magapreparar sang costumes ang magatenir man sa venue kag may 20 man ka mga choreographers kag dance masters.

P250,000 ang ginpain nga pondo sang Iloilo Festival Foundation Incorporated para sa pagkaun sang mga natungdan.

Naghingyo naman ang IFFI sa Iloilo City Police Office sang pulis nga magabantay sa ila venue para sa ila safety kag security.