Magulang, ginlabu sang manghod bangud sa gin-awayan nga kandidato sa San Enrique, Iloilo

SAN ENRIQUE, ILOILO — Pilason ang 30-anyos magulang sang ginlabo sang iya manghod gamit ang butcher knife kaina sang aga, sa Brgy. Poblacion Ilawod.

Ginkilala ang biktima kay alyas Dexter nga napilasan sa wala nga abaga. Samtang ginkilala naman ang suspect kay alyas Salvador 24-anyos.

Suno kay Lt. Kate Apaitan, deputy chief-of-police sang San Enrique MPS, may gin-endorso nga lokal nga kandidato ang iloy sang mag-utod kay Dexter apang wala niya ini mauyunan bangud may kandidato man siya nga ginasuportahan.

Nag-intra sa sugilanon sang mag-iloy ang manghod nga si Salvador tubtob nga nagpukutay sila sang iya magulang nga nagresulta sa paglabo sang suspect sa biktima.

Nalagyo si Salvador pagkatapos sang insidente samtang gindala naman sa ospital si Dexter.

Ginpahayag sang police nga may daan na nga record sang pag-away-away ang mag-utod.