Barangay kagawad sang Buenavista, Guimaras, nagreklamo nga gin-harass sang mga tinawo ni Guimaras Governor Samuel Gumarin

GUIMARAS — Nagpa-blotter sa Buenavista Police Station si barangay kagawad Winnie Ganancial matapos ginpulihan pugos kag gin-agawan sang cellphone sang mga ginatudlo niya nga tinawo ni Guimaras Governor Samuel Gumarin.Suno kay Ganancial, natabo ang insidente las 6:45 kaina sang aga.

Ginsugid ni Ganancial nga may nagpahibalo sa iya nga pumuluyo nga may madamo sang tawo sa balay sang iya paryente nga si Rubillo Villanueva sa amo nga barangay gani iya ginkadtuan kag ginkuhaan sang pictures gamit ang cellphone.

Apang ginlagas siya sang tatlo ka tawo, ginpulihan pugos kag gindumog tubtob nga gin-agaw ang iya cellphone nga may natago pa nga personal niya nga kwarta nga nagabalor sang P5,000 sa sulod sang casing.

Ginpangayuan man siya sang password sang iya cellphone. Gin-identify ni Ganancial ang duha sa tatlo ka nagpugos, nagdumog kag nag-agaw sa iya cellphone nga sanday ‘Tay Abam kag Ruben Sambas, samtang wala niya naman ma-identify ang isa pa ka lalaki.

Gin-claim ni Ganancial nga lunsay tinawo ni Governor Gumarin ang tatlo ka lalaki.

Ginpahayag ni Ganancial nga indi na niya mahakyaw ang iya kamot kag may mga lagub siya bangud sang natabo rason nga nagpa-medical check-up siya sa ospital.

Sang gin-interview sang Aksyon Radyo Iloilo si Police Major Kenneth Bermejo, hepe sang Buenavista Police Station may kaangtanan sa insidente, ginpahayag niya nga nagapadayon ang ila imbestigasyon.

Alleged robbery incidents suno sa iya ang natabo bangud sang pagkuha sang cellphone kag kwarta ni barangay kagawad Ganancial.

Ginatinguhaan man sang Aksyon Radyo news team nga makuhaan sang pahayag si Governor Gumarin.