Pila ka mga bubon sa Rizal Estanzuela, City Proper, positibo sa E-coli bacteria

ILOILO CITY — Positibo sa E-coli bacteria ang pila ka mga bubon sa Rizal Estanzuela, City Proper nga ginakuhaan sang tubig sang mga residente kag ginagamit sa ila pagpanghugas kag paligo.

Ini ang ginkumpirmar ni Kagawad June Mark Peralta matapos nagguwa ang resulta sang water test nga gin-conduct sang City Health Office.

Magluwas sa bubon, may water refilling station man sa barangay nga nagpositibo sa bacteria suno kay Peralta.

Bangud sini, ginpasiraduhan anay sang barangay ang mga bubon nga nagpositibo sa e-coli agud indi magamit.

Temporaryo nga nagakuha sang tubig ang mga residente sa duha ka bubon nga nagnegatibo sa bacteria.

Temporaryo man nga ginpasiraduhan ang water refilling station nga nagpositibo sa bacteria kag ginpa-comply sang mga dapat himuon agud masiguro nga safe ang ila tubig.

Ginpang-test ang tubig sa Rizal Estanzuela bangud may 16 na ka kaso sang acute gastroenteritis sa ila barangay.

Nagapati si Kgd. Peralta nga ang mahigko nga tubig sa ila lugar ang rason sang paglain sang pamatyag sang ila mga residente.