‘Daw nagakiwi’ nga girder sa Aganan Flyover sa Pavia na-obserbahan; DPWH 6 ginapangayuan sang paathag
ILOILO – Ginpangayuan sang paathag sang Sangguniang Bayan sang Pavia ang taga-Department of Public Works and Highways (DPWH) 6 bangud sa na-obserbahan nga may isa ka girder nga nagakiwi sa ginasugpunan nga girders sa ginapatindog nga Aganan Flyover sa banwa.
Ini ang ginpahayag ni Pavia SB Member Pyt Trimañez kasunod nga ginpalab-ot sa iya sang madamo nga mga pumuluyo ang ila obserbasyon sa girder gani gin-usisa niya.
Suno kay Trimañez, nagpamangkot sila sa DPWH kun amo gid man ang disenyo sang girder. Nagpasalig ang ahensiya nga i-check pa nila ang girder kag gilayon nga mahatag sang feedback sa Sanggunian.
Ginapaabot ni Trimañez ang sabat sang ahensiya subong nga semana.
“Madamo naman sang nakakita nga medyo indi siya align with other girders nga gina-angutan niya. Ginpasalig man kita nila [sang DPWH] kag balikan kita nila. I-check pa nila,” suno kay Trimañez.
Magluwas diri, may nagpadala man sang mga litrato sa konsehal nga “daw nagatiko” ang beam nga ginatungtungan sang girder sa amo man nga proyekto. Pero i-validate pa ini ni Trimañez kag kun may problema, gilayon niya nga i-report sa DPWH.
Ginatinguhaan pa sang Aksyon Radyo Iloilo nga makuhaan sang pahayag ang DPWH 6 kag contractor sang Aganan Flyover.
