Balay sa Sto. Niño, Arevalo nasunog

ILOILO CITY — Natupok sang kalayo ang isa ka balay sa Zone 5, Brgy. Sto. Niño Norte, Arevalo sang nasunog mga pasado las-7 kagab-i, Oktubre 11.

Ginapanag-iyahan ni Mary Jean Villegas ang nasunog nga balay nga human sa mixed materials.

Napunggan nga maglaton sa kaiping nga pamalay ang kalayo bangud sa pagbuligay sang mga pumuluyo nga gilayon ini nga mapalong.

Wala sang tawo ang balay sang nasunog. Suno naman kay Alyas Anjie nga kasilingan sang pamilya Villegas, posible nga halin sa linya sang kuryente ang kalayo bangud may deperensiya na ini antes ang sunog.

Nakibot lang sila suno sa iya nga nag-ibwal ang kalayo.

May napilasan naman nga residente sa kamot sang nagbulig sa pagpalong sang kalayo.

Nagapadayon pa ang imbestigasyon sang Bureau of Fire Protection- Iloilo City kun ano gid ang ginhalinan sang kalayo kag kun pila ang kahalitan.