‘Agaway’ sa pasahero sa Dumangas Port dapat ma-aksyonan na sang Dumangas LGU suno sa ATOP

ILOILO – Nagakabalaka si Association of Taxi Operators in Panay ukon ATOP President Perfecto Yap sa posibilidad nga may magluntad nga physical nga ginamo sa tunga sang taxi driver kag tricycle driver tungod lang sa agaway sang pasahero sa Dumangas port.

Reaksyon ini ni Yap kasunod sang reklamo sang taxi driver nga gintuyo siya kilkilan sang tricycle driver sa Dumangas port sang Enero 30, 2023.

Bangud sini, nagapangabay si Yap kay Mayor Braeden John Biron nga aksyonan gilayon agud indi na maglala pa ang sitwasyon.

Sa pagkamatuod, suno kay Yap madugay na ini nga reklamo sang mga taxi drivers pero tubtob subong nagahulat sila sa solusyon kag aksyon sang LGU-Dumangas.

Kaina sang aga, nag-meeting si Yap kay Mayor Biron kaupod ang LTO6 kag LTFRB6 kag gin-istoryahan ang mangin solusyon sang magtimbang nga bahin.