Punong Barangay sang Lip-ac, San Enrique, Iloilo dakup sa drug buy bust operation; 2 ka pusil na-recover sang pulis

ILOILO – Dakup sa drug buy bust operation si Lip-ac, San Enrique Punong Barangay Elvie Paez, 47, kahapon, Hunyo 26.

Sa Brgy. Palje, San Enrique siya nadakpan sang Station Drug Enforcement Team sang San Enrique Police Station.

Suno kay Police Captain Johnny Oro, hepe sang San Enrique MPS, nabaklan sang isa ka sachet sang suspected shabu si Paez nga nagabalor sang P1,000. Pero sang ginrekisa, nakuhaan pa gid siya sang dugang nga 11 ka sachets.

Magluwas diri, nakuhaan man si Paez sang duha ka improvised nga short firearms nga iya ginataklos kag motorsiklo nga ginapatihan sang police nga ginagamit niya sa illegal nga transaction.

Isa ka semana, suno kay Oro, gin-monitor sang San Enrique police ang illegal nga transaction sang kapitan antes ginhimo ang operasyon. Halin sa mga residente ang impormasyon may kaangtanan sa ginahimo sang kapitan, dugang ni Oro.

Ginatinguhaan pa sang Aksyon Radyo Iloilo nga makuhaan sang pahayag si Paez.