Malapit P2 million nga balor sang suspected shabu na-recover sa Jaro

ILOILO CITY — Malapit P2 million nga balor sang suspected shabu ang na-recover sa drug buy bust operation sa Barangay Arguelles, Jaro las-3:50 kaina sang hapon.

Suno kay Police Lieutenant Colonel Antonio Benitez, Jr., head sang City Drug Enforcement Unit sang Iloilo City Police Office, tungod sa impormasyon nga ginpalab-ot sang mga pumuluyo, nadakpan kanday alyas Longhair nga residente sang amo nga barangay kag alyas Mike nga call center agent kag taga-Balabago, Jaro nga ginakabig High Value Individuals.

Ginpahayag ni Benitez nga nagakadto sa balay ni alyas Longhair ang mga nagabakal kag didto nagakatabo ang transaksyon sa illegal nga druga.

Dugang pa niya, gintuad sang mga subject ang ngalan sang ginakuhaan nila sang supply sang ilegal nga druga apang gina-validate pa sang kapulisan.

Naglab-ot sang duha ka semana nga gin-monitor sang police tubtob nadakpan ang mga subject.

Ginabanta may kabug-aton nga 280 grams ukon 13 ka sachets sang suspected shabu ang nakuha sa mga subject. —via Maria Kayla Tingzon