Miss Eco International Ph 2025 Alex Brooks himuon nga Ambassadress sang turismo sa probinsya sang Iloilo
ILOILO – Ginaplano ni Iloilo Governor Arthur Defensor, Jr. nga himuon nga ambassadress sang turismo sa probinsiya si Alexie Brooks, ang bag-o lang ginkoronahan nga Miss Eco International Philippines.
Suno kay Defensor, luyag niya nga mapasanyog pa ang turismo sa probinsiya tungod madamo ini sang mapabugal sa amo nga industriya.
Bilang ambassador sang turismo, makabulig si Alexie sa pag-promote sang mga nagkalain-lain nga tourism programs sang Iloilo province agud nga mas makilala kag maganyat ang mga local kag foreign tourists nga magpadulong sa mga tourist spots.
Lakip sa mangin una nga i-promote ni Alexie ang ipaguwa nga Executive Order ni Defensor may kaangtanan sa pag-involve sang komunidad sa barangay nga mangin tourist destination ukon “Turista sa Barangay For MoRProGRes.”
Ginpasalamatan man sang gobernador ang Ilongga beauty queen tungod ginrepresentar niya sang maayo ang Iloilo. Plano ni Defensor nga magpadala sang congratulatory letter kay Alexie.
Ginakabig ni Gov. Defensor nga kadalag-an man sang Iloilo ang pagkorona kay Alexie bilang Miss Eco International Philippines.
Si Alexie ang nagtapos sa Top 10 sang Miss Universe Philippines 2024. — via Aksyon Cedrick Anona
