Pila ka drivers sang consolidated traditional jeepneys sa Leganes nag-untat biyahe sa full implementation sang ELPTRP tungod “indi maka-income kag makabayad sang arkila”
May mga drivers sang consolidated traditional jeepneys sa Leganes nga nag-untat sa pagbiyahe kaina, sa pagsugod sang full implementation sang enhanced Local Public Transport Route Plan sa Iloilo City.
Suno kay Mr. Billy Demafiles, operator sang La Paz-Leganes nga jeep, nagapanghakroy ang mga drivers tungod ginlimitahan lang sa 25% sang tanan nga consolidated units ang ginpasugtan nga makasulod sa siyudad.
“Kaina ang mga driver nagtilipon, nag-untat biyahe kay daw indi gid katrespaser sang ila income. Nakita sang mga miembro nga indi gid sila maka-income kag makabayad sang ila arkila,” suno kay Demafiles.
Puwede man suno kay Demafiles nga makabiyahe balik sa Leganes ang indi makasulod sa siyudad, pero indi man sigurado nga may pasahero gilayon nga masakay.
Nalakip ang unit ni Demafiles sa 25% nga nakasulod sa siyudad kaina kag gin-ako niya nga naka-ginansiya ang iya driver, “pero tatlo ka adlaw naman siya antes makabiyahe [liwat]. Amo na ang reklamo sang mga miembro nga problema gid ang enhanced LPTRP.”
Ginpalab-ut na nanday Demafiles ang ila concerns sa in-charge sang traffic management sang Leganes LGU nga nagpasalig nga suportahan kun ano man ang ila mangin lihok tungod nakita nga apektado ang mga sumalakay, drivers kag operators sang Leganes. — via Firingline
