5 ka unconsolidated PUJs nga may ruta Leganes Hi-way nagsulod sa siyudad nga wala nagkuha sang car pass; Manibela Panay ginrason nga gutom na ang mga drivers

ILOILO— Lima ka unconsolidated jeepneys nga may ruta Leganes Hi-way ang nagsulod sa Iloilo City nga wala nag-agi sa ginakuhaan sang car pass kahapon, Hunyo 19.

Suno kay Mr. Warren Gangoso, chairman sang Manibela Panay, nagpasimpalad sila tungod pila na ka bulan nga nagahulat sila nga pahanugutan nga makabiyahe pasulod sa siyudad.

Ginpabutyag ni Gangoso nga nagpadala sila sang request sa opisina sang Traffic Management Unit (TMU) kag ginpasundan sang mga plate numbers sang unconsolidated units nga naga-request nga makabiyahe pero wala gihapon sang sabat asta subong.

Kun mahulat lang sila suno kay Gangoso, magutman sila. Sa pagkamatuod suno sa iya, may upod na sila nga napatay tungod sa stress nga tuga sang PUV Modernization Program.

Pila naman ka bulan suno kay Gangoso nga nagalabay sila sa car-pass area pero wala sila ginahatagan sang sticker kag car pass tungod unconsolidated sila gani indi makabiyahe sa siyudad.

Kaina sang hapon, pagsulod sang unconsolidated jeepneys, nag-inform ang nagabantay sa car pass sa iya mga upod nga traffic enforcers sa Jaro nga bantayan ang jeep nga nagsulod tungod wala niya naabtan.

Nahangpan ni Gangoso nga ginatuman lang sang mga traffic aides ang ila nga duty gani ginpaathagan niya sang plastada kag ila request sa transport sector, gani ginpasugtan sila nga makalabay sa Jaro para makapauli.

Ginhambalan man sila sang traffic enforcers nga magkadto buwas sa opisina ni TMU co-chairman retired colonel Uldarico Garbanzos agud maplastar ila ang sitwasyon. — via Aksyon Farrah Mae Morano