Iloilo City Gov’t dugangan sang P5 million ang premyo sang Tribu Pan-ay nga nag-champion sa Aliwan Fiesta 2024

Dugangan ni Iloilo City Mayor Jerry Treñas sang P5 million ang premyo sang Dinagyang Festival nga ginarepresentar sang Tribu Pan-ay sang nag-champion sa Aliwan Fiesta 2024 Street Dance Competition sang Manila Broadcasting Company Media Group.

Suno kay Mayor Treñas, namunuhan na niya ang principal sang Fort San Pedro National High School nga magpadala sang sulat subong nga semana agud mapasulod sa supplemental budget.

Sa Special Education Fund kuhaon ang premyo.

Madumduman una na nagtanyag sang P10 million nga balor sang infrastructure project si Uswag Ilonggo Party-list Representative James “Jojo” Ang nga ipasulod sa 2025 national budget allocation.

Ini ang ika-8 nga championship title sang Dinagyang Festival sa Aliwan Fiesta Street Dance Competition nga gina-organisar sang MBC Media Group. — via Aksyon Justice Savannah Pamplona