2 ka menor-de-edad patay sang na-aksidente ang depasahero nga jeep sa Cagay, Leon
ILOILO — (UPDATED as of 11:37am) Patay ang duha ka menor-de-edad sang na-aksidente ang ila ginasakyan nga depasahero nga jeep sa Barangay Cagay, Leon kaina sang aga.
Ginkumpirmar ini ni Police Captain John Pedric Padilla, hepe sang Leon Police Station.
Gindala sa Aleosan District Hospital ang mga biktima apang gindeklarar nga dead-on-arrival ang lima ka tuig nga bata nga babaye kag 13-anyos nga solterito.
Gindala naman sa Rural Health Unit sang Leon ang iban nga mga pasahero nga nakaagum sang menor nga mga pilas, suno pa kay Captain Padilla.
Ang na-aksidente nga jeep sa Brgy. Cagay, Leon | Aug. 13, 2024
Sa imbestigasyon sang Leon police, halin sa Brgy. Cagay ang jeep kag nagapataklad sa kurbadahon kag madanlog nga porsyon sang dalan sang wala nakontrol sang driver ang manibela tubtob nga natumba, nag-us-os kag nahulog sa kilid sang karsada nga gina-obra.
Ginabanta sa 30 ang sakay sang jeep sa diin kalabanan mga estudyante nga mapakadto sa eskwelahan.
Gin-custody sang Leon police ang driver sang jeep. — via Aksyon Maria Kayla Tingzon
