Mga suspek sa pagpangransak sa Iloilo Supermart sa Tabuc Suba, Jaro ginapatihan miyembro sang “Termite Gang”
ILOILO CITY — Daku ang posibilidad nga miyembro sang kilala nga Termite Gang ang mga suspek sa pagransak kag pagpangawat sa Iloilo Supermart sa Tabuc Suba, Jaro sang Martes, Agosto 27.
Ini ang ginpabutyag ni Police Major Eduardo Siacon, hepe sang Iloilo City Police Station 9 kun basehan ang agi sang mga suspek nga ma-anggid sa modus sang nasambit nga grupo.
Apang gin-athag ni Major Siacon nga nagapadayon ang ila imbestigasyon agud makumpirmar ang grupo sang mga suspetsado.
Suno sa iya, tama ka precise sang obra sang mga suspek tungod sigurado nga diretso sa sulod sang establisemento ang ginkutkot nila nga buho.
Nagapati siya nga gin-surveillance sang mga suspek ang target antes ginhimo ang pagpangransak.
Posible man suno sa iya nga may ginpasulod nga tawo ang mga suspek sa Iloilo Supermart agud magpanilag para mahibaluan kun diin sila mabuho.
Sa dugang nga pagpangusisa sang Jaro police sa drainage nga gin-agyan sang mga suspek kahapon, ginpahayag ni Major Siacon nga may na-recover sila nga styro box sa lugar.
Posible suno sa iya nga nagabalon sang pagkaon kag tubig ang mga suspek sa idalum sang drainage samtang ginahimo ang pagbakbak.
Na-recover man sa drainage ang bara kag lagari para sa salsalon nga ginapatihan gingamit sa pagbuho sa salog kag pader. — via Aksyon Hotline
