Suspected shabu, pusil na-recover sa drug buy bust operation sa Concepcion, Iloilo

ILOILO— Apat ka indibidwal ang nadakpan sa drug buy bust operation sa Phase II, Shalom Village, Brgy. Bacjawan Sur, Concepcion sang Agosto 27.

Suno kay Police Major Ken Albert Lepsia, hepe sang Concepcion Municipal Police Station, subject sang operasyon si alyas Louie, 48-anyos sang Brgy. Macalbang, Concepcion.

Isa ka bulan nga gin-surveillance ang subject suno sa police tungod “nagadula-dula”.

Kagab-i, sang gin-operate ang subject, naabtan sang police ang tatlo pa ka indibidwal nga naga-pot session sa sulod sang isa ka unit nga gina-arkilahan sang subject.

Lakip sa mga nadakpan kanday alyas Mike, 31-anyos sang Brgy. Nipa, Concepcion; alyas John, 32-anyos sang Brgy. Macalbang, Concepcion; kag alyas Jena, 30-anyos sang Poblacion, Ajuy nga may kaso na sadto may kaangtanan sa illegal drugs.

Na-recover sa operasyon ang ginabanta nga 40 grams sang suspected shabu nga may standard drug price nga P272,000 kag homemade shot gun nga may duha ka bala.

May mga empty sachets kag used foil sa trash bag sa balay nga patimaan nga madamo pa gid ang naggamit, suno sa police.

Wala nagatuad ang subject kun diin nagakuha sang supply sang illegal drugs, suno sa police. — via Aksyon Farrah Mae Morano