Babaye patay sang nalumos sa busay sa Igtuble, Tubungan
ILOILO — Dead-on-arrival sa ospital ang 27-anyos nga babaye sang gin-report nga nalumos sa busay sa Igtuble, Tubungan pasado las-3 sang hapon sang Setyembre 3.
Ginkilala ang biktima kay Anne Maglocot sang Buyu-an, Tigbauan.
Suno kay Police Captain Alberto Mangilimotan, hepe sang Tubungan Municipal Police Station, pasaso las-5 na sa hapon gin-report sa ila ang insidente gani nag-conduct sila sang imbestigasyon.
Lima ka babaye nga mag-abyan ang nagpadulong sa busay upod sa ila nga tour guide, suno sa iya.
Sa pagpangusisa ni Police Senior Master Segeant Jasper Ryan Bastonero, imbestigador sang Tubungan Municipal Police Station, nagpungko ang biktima sa bato upod sa iya pakaisa samtang nakatusmaw ang ila tiil sa tubig.
Nadanlog ang biktima tungod sang mabaskog nga daludo sang tubig, suno sa police kag na-ipit ang iya nga lawas sa bato gani wala na nakabutwa.
Ginpabutyag man sang tour guide suno sa police nga nagpaandam siya nga delikado ang pagpungko sa mga bato tungod mabaskog ang daludo sang tubig.
Gintinguhaan pa sang tour guide nga salbaron ang biktima kag nagpangayo sang bulig sa MDRRMC tubtob gindala siya sa ospital. — via Aksyon Farrah Mae Morano
