16-anyos nga Grade 9 student nakuhaan sang suspected shabu sa iya medyas samtang yara sa eskwelahan sa Janiuay

ILOILO — Gindakop sang Janiuay police ang 16-anyos nga grade 9 student sang Abangay National High School sa Abangay, Janiuay sang nakuhaan sang plastic sachet sang suspected illegal drugs sa sulod sang iya classroom.

Natabo ang insidente kahapon sang isa-isa nga ginkapkapan sang maestro ang pila ka mga lalaki nga estudyante tungod sa impormasyon nga may nagdala sang kutsilyo sa eskwelahan.

Suno kay PCapt. Alwyn Salmon, hepe sang Janiuay Municipal Police Station, base sa gin-report sa ila sang maestro, nakuha ang plastic sachet sang suspected shabu sa ginasuksok nga medyas sang estudyante.

Nagabug-at sang 0.02 grams ang nakuha sa estudyante kag ginabanta nga may standard drug price nga P500.

Ginpaidalum man sa drug test ang amo nga estudyante tungod indi mag-ako kun nagagamit siya sang illegal nga druga. Indi man siya magsugid kun diin niya nakuha ang item.

Gin-turnover sang Janiuay police sa Municipal Social Welfare and Development Office (MSWDO) ang estudyante samtang ginahulat ang resulta sang drug test. — via Aksyon Marvin Malificiar