Meeting ni Congw Julienne Baronda kay House Speaker Martin Romualdez gin-request ni Uswag Ilonggo Party-list Cong. Jojo Ang
Ginkumpirmar sang kampo ni Congresswoman Julienne “Jam-Jam” Baronda ang meeting sa mga leaders sang ruling coalition lakip na si House Speaker Martin Romualdez sang Martes sang hapon.
Sa statement ni Pastor Stanley Flores, spokesperson sang kongresista, confidential kuntani ang amo nga meeting apang nag-una suno sa sa pagpaguwa sang pahayag ang pihak nga partido.
Gin-athag sang kampo ni Baronda nga ang gin-organisar sang partido ang amo nga meeting agud makabulig sa pagsolbar sang mga indi pag-intiendihanay sa tunga sang mga coalition members sa pila ka lugar sa pungsod.
Natigayon ang meeting base sa request ni Uswag Ilonggo Party-list Congressman James “Jojo” Ang sa tuyo nga mag-aregluhanay ang duha ka partido.
Apang gin-athag sang kampo ni Baronda nga exploratory lang ang amo nga meeting kag wala pa sang final decision tungod kinahanglan pa nga konsultahon sang kongresista ang iya campaign team sa iya pagbalik sa siyudad sang Iloilo.
Dugang pa ni Flores nga nagapabilin nga committed si Baronda sa iya mga plano kag tampad sa iya nga grupo.
Antes ang statement sang kongresista, nagtuhaw ang impormasyon nga na-istoryahan sa nasambit nga meeting ang pagpaiway ni Iloilo City Mayor Jerry Treñas nga magpadalagan sa masunod nga eleksyon kag ang iya bata nga si Executive Assistant Raisa Treñas-Chu ang makandidato sa pagka-alkalde, samtang mapa-reelect naman si Baronda.
