Anay jobhire kag taxi driver dakop sa drug bust operation sa Janiuay

ILOILO — Arestado ang anay jobhire sang Janiuay LGU kag driver sang taxi sa drug buy bust operation sa barangay Don T. Lutero East, Janiuay las 12:00 kaina sang kaagahon.

Ginkilala ang mga arestado kanday alyas Jose sang amo man nga barangay kag ginakabig High Value Individual kag alyas Arnold sang Barangay Aguingay, Janiuay.

Suno kay Police Major Dadjie Delima, head sang Provincial Drug Enforcement Unit (PDEU), lima ka adlaw lang ang monitoring sang police sa subject.

Ginpahayag ni Delima nga halin sa Metro Manila ang supply kag ginapaagi lang sa RoRo.

Ginakuha ini sang taxi driver kag ginadul-ong kay Jose sa Janiuay.

Apat ka sachets sang suspected shabu ang na-recover sa duha nga nagabug-at sang 125 grams ukon may standard drug price nga P900,000.

Na-recover pa gid sa ila ang P7,100 nga buy bust money kag taxi unit.

Dugang ni Delima magluwas sa Janiuay gina-distribute man ang suspected shabu sa siyudad sang Iloilo.