Masobra tunga sa milyon nga balor sang suspected shabu na-recover sa drug bust operation sa Molo
ILOILO CITY- Masobra P500,000 nga balor sang suspected shabu ang na-recover sa duha ka mga nadakpan sa drug buy bust operation sa Brgy. North Baluarte, Molo kahapon, Oktubre 28.
Ginkilala ang nga nadakpan kanday alyas Nognog, 44-anyos kag Koykoy, 35-anyos sang amo man nga barangay.
Suno kay Police Captain Ryan Christ Inot, officer-in-charge sang Police Station 4, makapila na ka beses ginreklamo sang mga residente si Nognog tungod nagabaligya sang illegal drugs sa ila barangay.
Sa pagpangusisa sang police, nakaagi preso sang 2013 sa kaso may kaangtanan sa illegal drugs si Nognog kag nakaguwa sang 2019 paagi sa plea bargaining agreement.
Ginahimo ni Nognog nga runner si Koykoy, suno sa police.
Nabaklan sang isa ka sachet sang suspected shabu si Nognog sa balor nga P7,000 gamit ang buy bust money.
Samtang, na-recover ang anum ka sachets sang suspected shabu nga nagabug-at sang 75 grams. — via Aksyon Paula Elambayo
