P2.7 million nga balor sang suspected shabu na-recover sa Jaro
ILOILO CITY — Na-recover ang P2.7 million nga balor sang suspected shabu sa drug buy bust operation sa Barangay Bitoon, Jaro las-8:55 kagab-i.
Ginkilala ni Police Captain Ryan Christ Inot, team leader sang City Drug Enforcement Unit (CDEU) ang mga subjects kanday Anton John Angcayan, 30-anyos kag iya pakaisa nga si Hyder John Angcayan, 24-anyos nga lunsay residente sang amo nga barangay. Lakip sa nadakpan si Sharie Mae Tolentino, 22-anyos nga live-in partner ni Hyder John.
Suno kay Inot, miyembro sang Happy Go Lucky (HGL) group nga ginabug-usan sang kilala nga drug personalities sang una sa Iloilo City nga yara sa New Bilibid Prison ang magpakaisa nga Angcayan.
Dugang niya, naglab-ot sa duha ka semana ang monitoring sa mga subjects tubtob nadakpan.
Ginpabutyag ni Inot nga makapila ka beses na nga ginasaway sang mga barangay officials ang tatlo sa ila mga transaksyon gani ginpalab-ot na nila ang impormasyon sa kapulisan.
Nakuha sa mga subjects ang lima ka sachets kag apat ka dalagku nga pinutos sang suspected shabu nga ginabanta nagabug-at sang 400 grams. — via Aksyon Maria Kayla Tingzon
