Bag-o ginbun-ag nga lapsag nakita sa kahilamunan sa Agtabo, Passi City

ILOILO — Nakit-an ang ginapatihan bag-o lang ginbun-ag nga baby girl sa kahilamunan sa higad sang dalan sa Brgy. Agtabo, Passi City.

Suno kay Senior Fire Officer 1 Jeric Jan Casamayor sang BFP Passi City nga una nga nagresponder sa lugar, buhi kag may tanda nga bag-o lang gid ginbun-ag ang lapsag sang nakit-an las-6 kahapon sang aga.

Wala sang bisan ano nga putos sa lawas sang nakit-an ang lapsag, kag nabulit pa sang dugo, suno kay Casamayor.

Wala pa na-utod ang pusod sang lapsag, dugang pa ni Casamayor.

Nakit-an naman ang inunlan sang lapsag mga lima ka metros ang kalayuon kun diin siya nakit-an.

Na-trace man sang taga-BFP Passi City ang tinulo sang preska nga dugo tubtob sa ginabanta 10 metros nga kalayuon halin sa lapsag.

Temporaryo nga gin-atipan sang midwife sang barangay ang lapsag samtang ginapangita ang iya ginikanan. — via Aksyon Marvin Malificiar