Mangunguma patay sang gintiro sang kasilingan sa San Joaquin; Suspek nag-surrender

ILOILO — Patay ang mangunguma sang natiruhan sang iya kasilingan sa Barangay Sinogbuhan, San Joaquin las-8 kagab-i.

Suno kay Police Captain Chrysler John Ledesma, hepe sang San Joaquin Municipal Police Station, ginsulong sang biktima nga si Nestor Vellojan, 59-anyos, si Jesus Sigue, 52-anyos, sa ila balay kag gintiro gamit ang 12 gauge homemade shotgun nga long barrel pero wala na-igo tungod nakahapa.

Nagbalos si Sigue kag na-igo sa tiyan si Vellojan. Gindala pa siya sa ospital pero gindeklarar nga dead-on-arrival.

Nag-surrender si Sigue dala ang iya 12-gauge shotgun kay Punong Barangay Edgardo Napata pagkatapos sang insidente.

Sa pagpangusisa sang police, ginlampusan sang suspect ang karabaw sang biktima tubtob mapatay, pito ka tuig na ang nakaligad.

Sa panaysayon sang kapitan, ginpahayag ni Ledesma nga madugay na ang natabu pero kun magsumalangay ang duha liwat nila madumduman ang insidente.

Preso sa San Joaquin police station ang suspect nga pasakaan sang kaso nga homicide. — via Aksyon Maria Kayla Tingzon