Lalaki patay sang ginbuno sang iya live-in partner sa Maasin

ILOILO- Patay ang 35-anyos nga lalaki sang ginbuno sang iya 48-anyos nga live-in partner sa Brgy. Dagami, Maasin pasado kahapon sang kaagahon.

Ginkilala ang napatay kay alyas Bert, samtang gintudlo nga nagbuno amo si alyas Joy.

Suno kay Police Major Rolando Araño, spokesperson sang Iloilo Police Provincial Office, antes ang insidente, nag-inum inom sa ila balay ang mag-live-in partner upod ang babaye nga pakaisa ni Joy.

Pagkatapos sini, nagtulog na ang mag-live in partner kag nagpauli man ang pakaisa ni Joy.

Sa imbestigasyon sang police, nakabugtaw si Joy sang nabatian nga nagapanawag si Bert sa balay sang iya pakaisa nga yara lang sa tupad sang ila balay.

Tungod sini, may natabo nga komprontasyon sa tunga nanday Joy kag Bert, suno sa police.

Ginpabutyag sang police nga gulpi lang nagkuha sang kutsilyo si Joy kag ginbuno si Bert sa tiyan.

Gindala pa sa ospital ang biktima pero napatay samtang ginabulong.

Pagpangimon ang motibo sa krimen, suno sa police.

Kaso nga murder ang ipasaka kay Joy nga preso na sa Maasin Police Station. — via Aksyon Paula Elambayo