Christmas parols sa siyudad sang Iloilo pasigahon sa Disyembre 1
Nagasige-sige ang pagpangsab-it sang mga Christmas Parols sa streetlights sa mga mayor nga dalanon sa siyudad sang Iloilo.
Suno kay Engineer Fulbert Woo, presidente sang Philippine Chamber of Commerce and Industry (PCCI)-Iloilo Chapter nga amo ang naga-organize sang proyekto, masobra na sa 100 ka mga parols ang napangsab-it sa streetlights halin sa Infante flyover pakadto sa Diversion Road, Mandurriao.
2,000 tanan ka mga parol ang ginpreparar sang PCCI upod sa Iloilo City Government subong nga tuig kag mahimo pa nga madugangan.
Ginpabutyag ni Engr. Woo nga lain nga design sang parol ang ginhimo subong nga tuig sang mga persons deprived of liberty (PDL) sa Bureau of Jail Management and Penology sa Ungka, Jaro.
Nagapangayo sang paghangop sa publiko ang PCCI sa ma-eksperyensyahan nga traffic sa mga dalanon tungod sa pagpangsab-it sang mga parols sang taga-Iloilo City Engineering Office sa mga masunod nga semana.
Tuigan na ini nga aktibidad sang PCCI kag Iloilo City Government agud mapanami ang siyudad.
Natalana nga pasigahon ang mga Christmas Parols sa siyudad sa Disyembre 1.
