Pusil nga gingamit ni JR Castro sa pagpatay kay San Rafael, Tigbauan barangay kagawad Joevanie Triste nakarehistro kay AAMBIS-OWA Party-list Rep. Atty. Lex Colada
ILOILO– Nakarehistro kay AAMBIS-OWWA Party-list Representative Atty. Lex Colada ang pusil nga gingamit tiro ni John Castro, Jr. kay San Rafael, Tigbauan Kagawad Joevanie Triste sang Oktubre 24.
Ini ang ginkumpirmar ni Iloilo Police Provincial Office Director Police Colonel Bayani Razalan sa ginpatawag nga press conference kahapon, Nobyembre 11.
Suno kay Razalan, sang ginpa-verify ang serial number nahibaluan nga nakarehistro kay Colada ang Rock Island caliber 45 nga pusil nga gingamit ni Castro sa krimen.
Nagapadayon ang imbestigasyon sang kapulisan kun paano nakalab-ut sa posesyon ni Castro ang pusil ni Colada.
Ginpahayag ni Police Captain Alfred Mansoy, hepe sang Tigbauan Municipal Police, Oktubre 26 sang may nag-report sa ila nga concerned citizen nga ginbilin ni Castro ang pusil sa iya kumpare pagkatapos sang insidente.
Gin-imbitar si Colada sa Regional Civil Security Unit 6 agud mapangayuan sang paathag kun paano nakalab-ot kay Castro ang iya nga pusil.
Una na nga nagpanindugan si Castro nga nakarehistro sa iya ngalan ang pusil nga gingamit sa krimen.
Sang Nobyembre 8 ginlubong si Triste kag padayon nga nagapanawagan sang hustisya ang iya nga pamilya.– via Aksyon Maria Kayla Tingzon
