9 ka tuig nga bata nga nagatabok sa pedestrian lane nabungguan sang SUV sa Jaro
ILOILO CITY — Nagreklamo sang pagpalanakit sa tuo nga tiil ang siyam ka tuig nga bata nga lalaki sang nabungguan sang SUV sa atubang sang Sambag Elementary School sa Jaro pasado kahapon, Nobyembre 12.
Suno kay Police Chief Master Sergeant Jeffrey Janay, traffic investigator sang Iloilo City Traffic Enforcement Unit, nagatabok ang bata sa pedestrian lane pakadto sa eskwelahan sang nabungguan sang SUV.
Halin sa direksyon sang Sambag ang SUV kag pakadto sa direksyon sang CPU.
Gin-athag ni Janay nga wala nagpalagyo ang driver sang SUV base sa pag-check sang CCTV footage. Nagpundo ang driver sang nabungguan ang bata, ginbalikan niya kag gin-check ang sitwasyon. Sang nagtawhay ang sitwasyon, naglakat na ang driver suno sa police.
Ginpa-check na sang TEU ang plate number sang SUV sa Land Transportation Office 6 agud mahibaluan ang impormasyon sang driver.
Nagresponder ang taga-Iloilo City Emergency Responders (ICER) sa aksidente. — via Aksyon Paula Elambayo
