P1.6 million nga balor sang suspected shabu na-recover sa ginakabig high value drug personality sa Pavia

ILOILO — Na-recover ang P1,632,000 nga balor sang suspected shabu sa buy bust operation sang Provincial Drug Enforcement Unit (PDEU) sa Brgy. Balabag, Pavia kagab-i, Marso 25.

Ginkilala ang subject kay alyas Rodson, 52-anyos residente sang Brgy. Desamparados, Jaro pero temporaryo nga nagatinir sa Brgy. Balabag, Pavia.

Ginakabig sang police nga high value drug personality si Rodson nga pila na ka bulan gin-monitor tubtob nga nadakpan.

Suno kay Police Major Dadje Delima, head sang PDEU, makapila na ka beses nagguwa ang ngalan ni Rodson sa mga drug subject nga nadakpan.

Nabaklan sang isa ka sachet sang suspected shabu ang subject sa balor nga P6,000.

Samtang, na-recover man sa subject ang tatlo ka magagmay nga sachets kag pito ka dalagku nga sachets sang suspected shabu. — Aksyon Paula Elambayo