Mga political merchandise items bawal nga ipanagtag sang mga kandidato
Ginabawalan sang Commission on Elections (COMELEC) ang mga kandidato nga magpanagtag sang political merchandise kun nagasugod na ang election period.
Lakip sa mga political merchandise items ang mga T-shirt, kalo, payong, pamaypay, kag iban pa nga may hitsura kag/ukon ngalan sang kandidato, lokal ukon national candidates man.
Suno kay Atty. Pinky Jevini Tentativa, Election Officer IV sang Iloilo City COMELEC, ang paghatag sang political merchandise mapa-anggid sa vote-buying. Ang vote-buying indi lang paagi sa kuwarta, kundi paagi man sa bisan ano nga may kantidad, dugang pa niya.
Base sa election laws nga ginapatuman sang COMELEC, election offense ini para sa mga kandidato tungod may “presumption” sang vote-buying.
Samtang, wala naman sang COMELEC resolution ukon jurisprudence nga nagahambal nga may election offense ang makita nga nagbaton kag nagsuksok ukon naggamit sang political merchandise items nga ginhatag sang kandidato.
Dugang pa ni Atty. Tentativa, para sa mga kandidato nga himuon rason ang donation ukon pledge sang political merchandise para sa iya kandidatura, indi ini mahimo nga indi pag-ilakip sa election expenditures tungod isa sa mga requirements sa pag-accomplish sang Statement of Contributions and Expenses (SOCE) ang deed of donation kag acceptance.
Gina-abisuhan gihapon sang komisyon ang publiko nga indi na lang paggamiton ang bisan ano nga political merchandise items nga ila mabaton. — Aksyon Marvin Malificiar
