Pag-obserba sang All Saints’ Day Kahapon, Nangin Malinong suno sa ICPO kag IPPO

Iloilo–Wala sang may narecord nga gamo ang Iloilo Police Provincial Office ukon IPPO may kaangtanan sa pag-obserba sang All Saints’ Day kahapon.

Ginpahayag ni IPPO Director PSSUPT Harold Tuzon nga tubtub may tawo pa nga nagabisita sa mga patyo, magapabilin sa pagbantay ang kapulisan.

Bisan may mga ginreport nga insidente sa pila ka banwa sang damlag lang, wala man ini ginapabay-an suno sa iya sang mga pulis tubtub nga masolbar ang kaso. Ginalakipan ini sang ginreport nga pagpangastigo sa Brgy. Cabilao Grande, Carles nga ginkamatay sang mag-amay nga Bensorto; shooting incident sa San Dionisio kag road rage sa Pavia. Ginpabutyag ni Tuzon nga padayon nga gina-imbestigaran sang kapulisan ang narecord nga mga insidente kag krimen.

Magluwas sa pagbantay sa mga patyo, wala man naga-untat ang kapulisan sa anti-drug operations sa probinsya. Pamatuod dire ang nadakpan nga punong barangay sang Pacuan, Lemery sa buybust operation sa Sara kag na-aresto man ang high level target level 2 drug personality sa Badiangan.

Malinong man ang assessment ni Iloilo City Police Office ukon ICPO Director PSSUPT Remus Zacharias Canieso sa okasyon kahapon. Wala suno sa iya sang may ginreport nga dalagko nga gamu sa sulod kag guwa sang mga patyo kag diutay lang ang mga nakumpiskar nga kontrabando.

Apang magapabilin sa pagbantay suno kay Canieso ang kapulisan agud masiguro nga wala sang malain nga matabu. (AGB)