Mandurriao police, blangko pa sa identity sang riding-in-tandem nga nagtiro patay kay Mercedes Nava kag kaupod nga si Erwin Fontillas

Iloilo City (UPDATE) – Wala pa sang identity ang Mandurriao police sang riding-in-tandem nga nagtiro patay kanday Mercedes ‘Gingging’ Nava kag Erwin Fontillas sa Calajunan, Mandurriao kaina sang aga, Enero 4.

Suno kay PCINSP Marlon Valencia, hepe sang Mandurriao Police Station, may joint investigation na sila sang Iloilo City Police Office kag ginapadalman ang motibo sa krimen. Gina-check suno sa iya kon may CCTV cameras sa area ukon malapit sa ginlutaran sang krimen.

May igo sa nagkalain-lain nga parte sang lawas kag ulo si Nava kag may mga pilas man sa lawas si Fontillas nga ginpangdala pa sa Western Visayas Medical Center pero wala natabangan.

Posible suno kay Valencia nga target si Nava nga driver sang Mitsubishi Strada kag nasalabat lang si Fontillas nga nagapungko man sa front seat. Wala napilasan ang duha pa ka kaupod nila sa likod.

‘Wala sang kontra’
Sa pagpangusisa sang police, wala nakahibalo ang utod sang biktima nga may kaaway siya magluwas sa ila pakaisa nga si Councilor Plaridel Nava.

Dugang ni Valencia, negatibo man ang kahilabtanan ni Gingging Nava sa illegal drugs sang gin-validate suno sa intel sang police station.

Ginpabutyag naman ni Oñate, Mandurriao Punong Barangay Willie Colon nga wala siya sang nahibaluan nga kaaway ang biktima. Suno pa sa kapitan, wala sang gin-report si Nava nga may pamahug siya sa kabuhi. (JoMaque)