ILOILO CITY— Imbestigahan sang konseho ang pagkahulog sang mag-iloy sa Ferris Wheel sa peryahan sa Diversion Road, Mandurriao sang Sabado, Enero 26.

Sa privilege speech ni Councilor Plaridel Nava, ginpahayag sang konsehal nga dapat maghimo sang investigation in aid of legislation ang konseho agud mahibaluan kun ano ang rason nga nahulog ang mag-iloy sa ferris wheel agud ma-regulate ang mga amusement rides sa syudad.

Ginpahayag ni Nava nga wala sang safety measures ang syudad para sa mga amusement rides, pareho sang pagdumili sa kabataan nga nagapang-edaron duha ka tuig panubo kag pagbutang sang seat belts.

Dugang pa niya, indi mamanduan ang Public Safety and Transportation Management Office (PSTMO) nga i-check ang mga amusement rides bangud wala sila sang basehan nga ordinansa.

Gin-refer sa Committee on Public Safety nga ginapamunuan ni Councilor Joshua Alim ang pag-imbestigar. (JoMaque)