CAPIZ — Masobra isa ka libo nga mga sugarcane planters sa Capiz ang apektado sang halit nga gintuga sang red-striped soft scale insect sa mga tubo.
Ini ang rason sang pagpaidalum sa probinsiya sa State of Calamity epektibo subong nga adlaw.
Naglab-ut sa 3,331 ka ektarya sang katubuhan ang naapektuhan sang amo nga insekto.
Ang mga banwa sang Cuartero, Dao, Dumalag, Dumarao, Jamindan, Maayon, Panitan, Pilar, Pontevedra, President Roxas, kag Sigma ang mga apektado sini.
Sa pagpaidalum sa state of calamity, mapahulag sang provincial government ang bulig para sa mga mangunguma agud malikawan ang dugang pa nga epekto sa sektor sang agrikultura.
Ang red-striped soft scale insect, gamay nga insekto nga nagapilit sa idalom nga parte sang mga dahon sang tubo. Ginasuyop sini ang matam-is nga duga sang tanom.
Tungod sini, naga-yellow ang mga dahon, nagaluya ang tubo nga nagaresulta sa pagnubo sang produksyon.
