Nagatabok sa dalan patay sang nabungguan sang pick up sa Dingle

ILOILO — Dead-on-arrival sa ospital ang 52-anyos nga nagatabok sa dalan sang nabungguan sang pick up sa Barangay Tinocuan, Dingle las-5 kahapon sang hapon.

Suno kay Police Captain Alwin Salmon, officer-in-charge sang Dingle Municipal Police Station, naghingagaw tabok si alyas Rey, 52-anyos residente sang Barangay Buenavista, Dingle gani nalab-ot siya sang pick up nga ginamaneho ni alyas Al, 38-anyos nga taga-Dasmarinas, Cavite.

Halin sa direksyon sang Pototan si Al sang nagtabok halin sa tuo niya si Rey.

Madasig ang padalagan sang pick up pero, suno kay Salmon, husto lang ang iya speed tungod national highway ang lugar.

Detained sa police station si Al samtang ginahulat ang desisyon sang pamilya sa pagpasaka sang kaso.