Lalaki nga nagtambung sa birthday party, patay matapos gintiro!

Jaro, Iloilo City–Wala gid nakaluwas ang lalaki nga ginpa-arakan tiro sa Barangay Tacas kagab-i.

Suno kay C/Insp. Herbert Ballego, hepe sang Jaro Police Station, nagtambung si Degoma sa birthday sang bata ni Felix Arhenal antes gintiro. Gintudlo nga naghimo sang krimen ang magpakaisa nga Rodney Jacolina alyas Nono kag Eugenio Jacolina alyas Pedring. May nakuha nga CCTV footage ang mga pulis nga nagapakita sang paglagas sang mga suspek kay Degoma.

Ginpanugyan naman ni C/Insp. Hilarion Roga sang SOCO nga ipa-autopsy ang bangkay sang biktima. Ini agud mabal-an kon nagagamit sang illegal drugs si Degoma. Kasunod ini sang nakuha nga isa ka sachet sang suspected shabu kag improvised tooter sa bulsa ni Degoma.

Nagapabilin nga at-large ang mga suspek.

May, 2012 shooting

Isa si Degoma sa ginkasuhan sang murder may kaangtanan sa kamatayon ni PO3 Jerome Jacolina nga assigned sadto sa intelligence section sang Jaro Police Station.

Mayo 10, 2012 sang may natabu nga komosyon sa Bikini Open sa Barangay Tacas. Ginreport sadto nga nagba-isay si PO3 Jacolina kag Tacas Punong Barangay Rolando Taboada antes nabatian ang sunod-sunod nga mga lupok sang pusil. Napatay sanday PO3 Jacolina kag Punong Barangay Taboada subong man kanday Remy Jacolina kag Avelino Sabidales. Si Degoma ang kaupod sang napatay nga punong barangay. (Aine Grace Bravo)