Suspek nga gintudlo naghalok, nagkastigo kag nagtuyo himulos sa 72 anyos nga paltera sa Banate, nakaagi na preso

Banate, Iloilo — (UPDATE) Naka-agi preso ang suspek nga gintudlo naghalok, nagkastigo kag nagtuyo himulos sa 72 anyos nga paltera sa Barangay Dela Paz Banate kagab-i.

Suno kay SPO2 Cyril Baldemor, deputy chief sang Banate Police Station, sang Disyembre 2016 lang nakaguwa sa Boys Town si Regie Besen alyas Doroy, 21-anyos, matapos napreso sang menor-de-edad pa siya sa kaso nga homicide kag frustrated homicide.

Nagaduda ang mga residente suno kay Baldemor nga nagagamit sang illegal drugs si besen bangud sa iya nahimo kay alyas Felicita.

Ginkonfirmar ni Baldemor nga naka-inom ang suspek sang nasugata sini ang biktima.

Base sa imbestigasyon sang banate police, una nga ginhalukan ni Besen si alyas Felicita apang nagpanginpadlos ang ulihi gani posible ini ang rason nga ginsakit siya sang suspek.

Nakasinggit kag nakapangayo sang bulig ang biktima gani nagpalagyo si Besen pero ginpahayag nga ginhurikap pa sini ang kinatawo ni alyas Felicita.

May mga bagras sa lawas ang biktima nga padayon nga ginabulong sa Western Visayas Medical Center. (JoMaque)