(UPDATE) Quezon, Arevalo Punong Barangay Visamin Cañal, nagproseso na sang mga dokumento agud mangayo protection sa Comelec kasunod sang ginpahayag pamahug sa iya kabuhi

Iloilo City— Gina-proseso na ni Quezon, Arevalo Punong Barangay Vismin “Nonong” Cañal ang mga dokumento agud magpangayo sang proteksyon sa Comelec bangud sa pamahog sa iya kabuhi.

Kasunod ini sang iya natukiban nga siya ang target nga patyon sang Gepulango Criminal Group nga involved sa tiruhay sa Yulo Drive, Arevalo sang Lunes sang gab-i. Ginatugyan man ni Cañal sa kapulisan ang pag-imbestigar kun bala may kahilabtanan sa tuyo nga pagpapatay sa iya ang kontra niya sa eleksyon nga si anay Punong Barangay Letty Yap.

Bangud ini sa impormasyon nga ginatudlo ginapanag-iyahan sang bata nga babaye ni Yap ang Isuzu MU-X nga gingamit kag ginbilin sang mga miembro sang Gepulango group nga subject sa operation sang PNP-CIDG.

Gin-identify ni Cañal ang salakyan nga makapila niya ka beses nakita nga nagabalik-balik sa iya balay sang Mayo 6 kag 7.

Nagpa-blotter sa Arevalo Police Station kahapon ang kapitan matapos nahibaluan sa PNP-CIDG nga may target nga patyon ang Gepulango group. (AGB)