Wanted person nga ginpahayag may mataas nga posisyon sa Kilusang Rehiyong-Panay, nadakpan sa Tanza Timawa
Camp Delgado, Iloilo City–Arestado ang asawa sang ginatudlo nga secretary sang Central Front Committee sang Kilusang Rehiyon-Panay (KR-P) matapos ginserbihan sang warrant of arrest sa kaso nga rebellion sa Tanza-Timawa, City Proper kaina sang aga.
Ginkilala ang nadakpan kay Maria Theresa Cabales, 61-anyos kag pumuluyo sang Brgy. San Juan, Molo.
Suno kay Police Regional Office 6 Director PCSUPT John Bulalacao, asawa si Cabales alyas Teray/alyas Sandy ni CTL Roberto Cabales nga ginpahayag opisyal sang KR-Panay.
Suno pa kay Bulalacao, miembro man si Cabales sang Regional Medical Staff sang KR-P. Dugang sini, medical staff sang KR-P si Cabales kag in-charge sang medical trainings kag suport sang nagkalain-lain nga komitiba sang CPP-NPA sa rehiyon.
Ginpanginwala ni Cabales ang akusasyon sa iya kag nagpanindugan nga indi siya miembro sang Communist Party of the Philippines-National Democratic Front-New People’s Army ukon CPP-NDF-NPA.
Ginpahayag sang nadakpan nga ginasulong niya ang kawsa sang mga manunudlo bilang staff sa Alliance of Concerned Teachers ukon ACT.
Natalana iturn-over si Cabales sa korte sa Mambusao, Capiz nga nag-issue sang warrant of arrest batuk sa iya.
Php 40,000 ang gintalana nga pyansa para sa iya temporaryo nga kahilwayan. (AGB)