PRO 6 Director John Bulalacao, nag-ako nga kinulbaan siya sang nahibaluan ang pagpangboma sa Jolo, Sulu kadungan sang highlight sang Dinagyang Festival

Iloilo City— Gin-ako ni Chief Supt John Bulalacao, Police Regional Office 6 director, nga kinulbaan siya sang nabaton ang balita sang pagpangbomba sa simbahan sa Jolo, Sulu sang Dominggo, Enero 27.

Natabu ang pagpangbomba kadungan sa highlight sang Dinagyang Festival sa Iloilo kag madamo nga mga tawo ang nagatipon.

Ini ang rason suno kay Bulalacao nga kinulbaan siya bangud sa posible spill over sa Iloilo.

Indi magnubo sa 20 ang napatay kag madamo ang napilasan sa pagpangbomba.

Kahapon, ginmandu ni PNP Chief Director General Oscar Albayalde ang nationwide heightened alert status sa PNP.

Ginpasiguro ni Bulalacao nga wala sang dapat kabalak-an ang mga pumuluyo bangud tried and tested na suno sa iya ang ila nga security framework.

May contingency plans man sila agud masiguro ang kaluwasan sang publiko.

Isa sa ginapanghandaan sang kapulisan suno kay Bulalacao ang nagahilapit nga Jaro fiesta nga masami man ginadugukan sang madamo nga tawo. (AGB/MO)