Isyu sa Speed Limit Ordinance sa siyudad nga wala napatuman, nabuhi kasunod sang aksidente sa Diversion Road nga nagpatay sang mag-asawa

Iloilo City-Kanugon sang Speed Limit ordinance sang siyudad nga wala napatuman.

Ini ang reaksyon ni Councilor Joshua Alim, author sang amo nga ordinansa makaligad nagtulog ini matapos nga napasar pila ka tuig na ang nakaligad.

Una kuntani ini nga ipatuman sa Diversion Road, Mandurriao.

Hunyo 1, 2017 sang una ginpropose nga ipatuman ang ordinansa pero ginsuspender bangud sang mga amendments.

Base sa Regulation Ordinance 2015-283, 60km/hour ang maximum speed limit sang mga passenger automobiles kag motorcycles halin sa corner sang General Luna, Street asta sa Diversion Road kag tubtob sa Ungka, Jaro.

Para sa mga trucks kag buses naman, ang speed limit nagalab-ut sa 50 km/h.

Lakip sa mga naaprubahan nga amendments sa ordinansa ang:

*60/kph ang speed limit halin Jaro Plaza pakadto Buntatala, Jaro kag Mandurriao Plaza pakadto Hibao-an;

*70/kph naman ang circumferential roads; kag

*40/kph sa iban nga dalanon sa syudad

Wala naman nakahibalo si Alim kun ngaa wala napatuman sang executive ang ordinansa bisan pa madamo sang budget kag natestingan naman sadto suno sa iya ang speed guns nga gamiton sa pagmonitor sa kadasigon sang mga nagalabay nga salakyan.

Nagalaum si Alim nga ma-implementar ang ordinansa.

Kaina sang aga, napatay ang mag-asawa nga nagatabok sa Diversion Road matapos sila nabungguan sang nagahagunos nga Mazda. (JoMaque)