6 lakip ang tag-iya sang sakayan nga nagkapan sa kadagatan sang Caluya, Antique, na-rescue

By: Aine Grace Bravo | August 30, 2019

via Caluya MPS

Antique — Na-rescue ang anum tanan ka sakay lakip ang tag-iya sang MB Eliza nga nagkapan samtang nagalayag halin sa Panagatan 2 islet padulong sa Caluya Island.

Natabu ang insidente kagab-i, Agosto 29, sa kadagatan nga sakop sang Sibato Island sa Caluya, Antique.

Nabaton sang Caluya Police Station ang impormasyon las 8:47 kagab-i kag las 9:15 na-locate sang nagresponder nga mga police halin sa Caluya PNP kag Philippine Coastguard ang sakayan.

Nagakarga sang 500 ka saku sang dried seaweeds ang MB Eliza sang nakasumalang sang mabaskog nga hangin kag ulan sa dagat.

Gindala sa Sibato Island ang mga tripulante.

Suno kay PCpl Noemi Bayalo sang Caluya PNP, indi na makita sang mga sakay ang palibot bangud sang tuman ka lain nga panahon.

Nakabunggo sa bato ang sakayan nga nagtuga sang buho sa hull sang motorboat tubtob amat-amat nga nagkapan.

Natapos ang rescue operation alas 12:30 kaina sang kaagahon pero ginbalikan subong nga aga sang mga otoridad ang sakayan agud maguyod pahigad.