Provincial government, mabakal sang dugang nga thermal scanner kag face masks bangud sa padayon nga paglapta sang N-CoV

By: Aine Grace Bravo | January 31, 2020

via Hotline

Iloilo — Ginahingagaw sang Iloilo Provincial Government nga makabakal sang thermal scanner kag face mask samtang padayon nga nagalapta ang novel coronavirus sa iban nga pungsod nga nag-umpisa sa China.

Suno kay Governor Arthur Defensor Jr., luyag niya nga madugangan ang thermal scanner sang Bureau of Quarantine agud hugot nga mabantayan ang mga nagasulod sa probinsiya.

Tinguhaan niya nga mabutangan sang mga scanner ang mga RoRo ports. Sa subong, padayon pa ang pagpangita sang mabaklan sang scanners.

Samtang, ginapaligban kun diin makabakal sang face mask bangud may problema sa suplay.

Bisan sa mga botika sa siyudad sang Iloilo, ginakulang man ang suplay sang face mask suno kay Defensor.