Pagka-infect sa COVID-19 sang 4 frontliners sang Alimodian, Iloilo, gina-usisa na — Mayor Alonsabe

By: JoMaque/Ariel Solacito | June 30, 2020

Alimodian, ILOILO – Gina-usisa na kun paano na-infect sang COVID-19 ang apat (4) ka mga frontliners sang Alimodian.

Suno kay Alimodian Mayor Geefre “Kalay” Alonsabe, isa sa ginatan-aw nga posible nalipatan nila ang husto nga protocols sa pag-uba sang ila ginasuksok nga PPEs.

Dungan nga naga-duty suno sa alkalde ang apat ka mga frontliners sa quarantine facility sang banwa sa sulod sang 10 ka adlaw.

Gin-report sang DOH 6 subong nga adlaw nga 13 ang nagpositibo sa COVID-19 halin sa Alimodian nga ginalakipan sang apat ka mga frontliners, lima (5) ka miyembro sang pamilya sang isa sa mga na-infect nga frontliners kag apat (4) ka mga locally stranded individuals.

Ginkumpirmar ni Alonsabe nga nakapauli sa ila balay ang isa ka frontliner gani nagka-contact sa iya pamilya.

Sang Hunyo 23, masobra 20 ang ginkuhaan sang swab lakip ang mga frontliners, LSIs kag miyembro sang pamilya sang isa ka frontliner kag 13 sa ila ang nag-positibo sa COVID-19.

Naka-quarantine na suno sa iya ang mga nagpositibo kag hugot nga gina-monitor samtang nagapadayon pa ang contact tracing.| Via Firingline